*كتابات عيد (إعادة)*

➖◼️➖

المرة دي لقيت لي فرصة أحوم حوامة العيد مع أبوي .. لفينا الحلة بيت بيت نسلم ونبارك

.

لاحظت لي أبوي لما نمشي بيت ويسأل من زول معين يلقاهو مافي كان بخت ليهو وصية ( لما يجي فلان قولو ليهو خالد ود سعيد الحداد جا سأل منك)

.

بقينا برانا وسألت أبوي وانا مندهش

_ إنت يا ابوي ليه بتقول ود سعيد الحداد

_ ما دا أبوي ياولد دايرني أقول شنو

_ قوليهم بروفسير خالد سعيد .. الاقتصادي المشهور العندو طلاب اكتر من سكان الحلة الحايمين فيها دي

_ قال لي دا تعريف لي أبوك إنت ما أبوي أنا .. ثم ثانيا كل زول حر يعرف بي نفسو .. ثالثا أنا ماداير أقدم في وظيفة أنا حايم في الحلة المولود وعايش فيها

_ قلت ليهو يا أبوي خلي الناس تعرفك صاح

_ قال لي كلامك صاح مفروض الناس تعرفك صاح بس داير اسألك

هل صحيت نص الليل وفتحت الباب لقيت زول عايز ابوك عشان محتاج كفن ولا مساعدة في غسيل ميت .. هل في زول قبال كدة فقد ابوك عشان ماسمعو رفع آذان الصبح .. هل دقو باب بيتكم ناس عشان دايرين ابوك في جودية وصلح بين اتنين متخاصمين .. هل باب بيتنا دا دقاهو زول محتاج سلم الخشب أو العتلة أو الكوريك والكرك البلمو بيهو الوسخ

إنت بتعرف عن سعيد الحداد شنو وداير تتفاصح

هل جراك من يدك وساقك تشيل فاتحة في مدني ولا وداك تحضر عقد قران في كسلا ولا لفيت معاهو من مستشفى لي مستشفى عشان تزور العيانين

جدك دا أحسن زول يضايرنا جوة لما البيت يتملي ضيوف حتى لو ننوم في البروش واحرف من يمسك دفتر صيانة الجامع والمع من يشيل كيس بلح عشان واحد من عيال الحلة نجح في امتحان

أنا بقوليهم خالد ود سعيد الحداد لانو بخطف من أمي صينية الغدا لبيت البكا .. ماحصل جدك دا احرج أمي ورفع الطبق من الصينية عشان يعرفها طبخت لبيت البكا شنو .. بشيل الصينية مغطية ونحنا ماشين وراهو وما بكشفها إلا قدام الضيوف حتى لو فيها كسرة بالموية .. لابحرج أمي لابخجل من الشايلو

.

جدك ياولدي كان زول ماساهل عشان كدة لما اقول للناس أنا ود سعيد الحداد بتمنى الناس كلها تصدقني وتعتبرني مالي الفجة الختاني فيها.

*سهل الطيب