وطنية كووووو

*وطنية كووووو*

➖🟢➖

*(مُهرة نيوز)*

▪️البلد دي سايقنها شلليات وعميانيين والحفرة على بعد خطوات …

▪️أضحت البلد دايرة في حلقة فشل مفرغة والسبب عقلية الشلليات وقِصر الرؤيا ليه كل المساعي بتفشل في السودان ونحن كسودانيين بنحاول نفشل اي شئ ؟

مرة رباعية وتفشل.

مرة خماسية وتفشل.

جدة وتفشل.

إيقاد وتفشل.

جامعة عربية وتفشل.

اتحاد أفريقي ويفشل.

أمم متحدة وتفشل.

أمريكا وتفشل.

المنامة وتفشل.

حوار سوداني سوداني وبرضو يفشل

( سوداني عايز سوداني مافي )

▪️بنلاقي السبب واحد البلد ماشة بالشلليات وكل شلة عندها أحلامها الوردية العايزة تحققها كل شلة كايسة مصلحة اليوم مصلحة كرسي منصب مصلحة غنيمة وتكويش على المال العام مصلحة نفوذ عشان تشتغل بفكرة ( سلطة للساق ولا مال للخناق ) …

▪️لكن مافي شلة واحدة من السياسين والحركات بتسأل:

طيب بعد 5 سنين من هسي البحصل شنو للبلد دي ؟

طيب ياخ بعد 10 سنين السودان ده شكلو كيف؟

الاقتصاد المنهار ده ماشي على وين؟

الشعب البيموت كل يوم من سيء لأسوأ مصيرو شنو؟

▪️الكارثة:

دي شلليات يبدو انها لا قارية تاريخ لا عاشت تجارب ولا بتتعلم من درس معقول نحن عقود من الزمان نقع من حفرة ونقوم من حفرة مافي ود مقنعة قلبه محدثه يرفع البلد دي بوطنية خالصة الشلليات دي ما بتفكر في عالم بيتغير كيف ولا في تحالفات بتتبدل ولا في اقتصاد بينهار قدام عيونهم وممكن هم زاتهم يكونوا اساس الانهيار بسبب الفساد ..

مافي شلة سياسية عاملة حساب للحظة السقوط الكبير للوطن وردم اهله في حفرة النسيان …

الشئ الحاصل قدامنا ده بيقول حقيقة مٌرة البلد دي ما عندها وجيع وكل زول في مصلحته الخاصة

( ماشة مشي العميان.. والحفرة قدامها قريبة )

لكن على كل حال زي ما بقول طوالي لو مسمار النص اتفكا ولو الشلليات واصلت في العمي بتاعها، الحفرة الجاية ما بنقوم منها.

الحل؟

نشطب فكرة الشلليات ونبني ( دولة محترمة زي العالم )

نشطب فكرة غنيمة اليوم ونفكر في ( وطن بكرة )

قبل ما نصحى نلقى روحنا في دولة كانت اسمها السودان أصبحت إقطاعيات …

*عائشة الماجدي*

___________

*للانضمام لـ (مُهرة 8)*

https://chat.whatsapp.com/DFamMLHTRbdDdOE5muSJRm?mode=gi_t