الشغل دا عاوز ليه (نضارتين)
أشرف خليل
- يناير 16, 2026
*الشغل دا عاوز ليه (نضارتين)* ➖⚽➖ *(مُهرة نيوز)* جبت لي نضارتين.. قلت الشغل دا نضارة واحدة ما بتمرقو. نضارة قراية ونضارة شمس. نضارة لي ناس روفا ونضارة لي ناس خاطر عوض الله. نضارة لمباراة كيجالي ونضارة لمباراة بورتسودان. نضارة كيجالي كانت زرقاء ونضارة بورتسودان كانت بيضاء. صنداي سجل الهدف الأول.. لبست النضارة الزرقاء طلعت البيضاء. مازن فضل سجّل هدفاً.. طلعت النضارة الزرقاء ولبست النضارة البيضاء. بقيت شغال كدا زي كأني برمي في زلابية. ألبس البيضاء ناس الزرقاء يسجلوا.. ألبس الزرقاء، ناس البيضاء يسجلوا. ما عرفت أعمل شنو؟ الغربال عاوز يسدد.. قلت اطلع البيضاء وألبس الزرقاء.. قبل ما اطلعها تايو سجّل الهدف الثاني في بورتسودان.. اتلخبطت جنس لخبطة.. قلت أنا أحسن بطلع نضارة وألبس نضارة في ناس عينهم طلعت .. نحن لو بقت عندنا على النضارة ما مشكلة. بقيت شغّال كدا.. زي الزول البتكلم في تلفونين مختلفين في نفس الوقت. اطلع البيضاء.. ناس الزرقاء يسجلوا.. ألبس الزرقاء ناس البيضاء يسجلوا.. ومازن سيمبو مرة يظهر لي في كجيالي ومرة يظهر لي في بورتسودان.. ما عرفت المشكلة وين؟ في الطبق ام في النضارة ؟ عشان كدا ما قدرت اعرف فلمو دخل بديل في مباراة كيجالي أم مباراة بورتسودان؟ يدخل ياسر مزمل ألبس ليهم البيضاء.. يدخل ماديكي ألبس الزرقاء. جابوا لي شاي اللبن.. قلت ليهم جيبوا لي كبايتين.. عشان أنا قاعد أحضر في مباراتين. عندنا جارنا ما عندهُ علاقة بالكورة.. قلت ليه الليلة الهلال فاز في كيجالي 3 / 0 وفاز في بورتسودان 2 / 0. جارنا قال لي يا زول انت ما نصيح.. الحرب دي عملت ليك ازدواج في الشخصية، انت جنيت؟ قدر ما حاولت أقنعهُ واشرح ليه ما اقتنع.. قلت أقرب ليه الحكاية.. قلت ليه بتعرف الموبايل أبوشريحتين. قال لي أيوة. قلت ليه الهلال بقى شغال بي شريحتين. الكلام وقع ليه.. قال لي طيب ما تقول كدا من الصباح.. ثم أضاف وكانتي مع يأتون شريحة؟ محمد عبد الماجد _____________ *انضم معنا لاستاد مُهرة علي الواتساب:* https://chat.whatsapp.com/F8NtnJnUYCo6VP1YkRV4bd
Read more
